Mark 13

YisasiꞋa “Ala mono nona tagape ailavigahie.” huno humaine.

1YisasiꞋa ala mono nona neꞋataleno vigeno nagola agaiꞋaenema tokaeno nemaiya kanomoꞋa mage hie “Hulavenelina kanomogae male ago. Ala yafana kanale yafaꞋyagaleti kimalenaya kanale noꞋyaga hanegeka neꞋagane.” huno hie. 2Higeno YisasiꞋa mage huno hie “Kagaya mani kanaleꞋnale ala noꞋyaga neꞋagano? Ani mukiꞋa yafaꞋyaga alino lagape aitalesigeno aposilavisianagi nago yafamoꞋa nago yafamo agupifina aikalo huno omaigahie.” huno hie.

YisasiꞋa “TusiꞋa kana yamo falote hugahie.” huno hie.

3YisasiꞋa Olivi yosa hanea agoꞋyamo agegayalega haino mopale maineno ageana ala mono nona atu kaiyaga hanegeno neꞋagegeꞋya PitaꞋene YemesiꞋene YoniꞋene EtaluꞋene YisasiꞋma mainelega emainae. 4EꞋya Yisasife mage huꞋya havigae “Ani yafa nomoꞋa tagapema aisia kana na kanafine? Hana augafa tokiya avame yamo ani kanama faloteꞋma hisia kanafina taveligahie?” huꞋya havigae.

5Hageno YisasiꞋa mage huno hie “NagoꞋa vayaꞋmoꞋya havigema lamahapaisagetamahena ohavisaya yafe kaꞋye ho. 6MukiꞋa vayaꞋmoꞋya nagai nagia neꞋayeꞋya ‘Anumaya KotiꞋa tamaugafa aligatisuna yafe hulategeta neꞋone.” huꞋyama hisayana kasagoꞋya veaꞋne havige ayemavataga hugahae.

7“NagoꞋa kotega kamema nehae.” huꞋya hisagetamaene “Kotamile-gaenema kamema nehae” huꞋyama tamahapaisagetamahena kolia ohiho. Ani yaꞋyagamoꞋa hagoteno falote hugahianagi ma mopama haꞋno hisia kanamoꞋa yaufa falote ohune. 8NagoꞋa vayaꞋmoꞋya alu vayaꞋenena kamea hugahae. Ala kotega vayaꞋene nago ala kotega vayaꞋenena kamea hugahae. KasagoꞋya alu kote kotela tusiꞋa imila aligahie. Alu kote kotela tusiꞋa kafu nehuꞋya amakatesia kanamoꞋa falote hugahie. Ani yaꞋyagamoꞋa afaꞋa aꞋnemoꞋya nafaꞋnema ategahema hageno aepa heno amagata neꞋaiya avamete kava hugahianagi haenagaꞋa tusiꞋa tamagata yamo falote hugahie.

9Tamakaitamia kava yagailama hiho. NagoꞋa veaꞋmoꞋya tamakaila tamavaleꞋya kanisole vayate kaiyekea hulamategahae. Mono nopi tamavaleꞋya kaꞋyona mo lamamigahae. Nagai nakaveꞋma haya yafe tamavaleꞋya ala kava vayateꞋene amakasemainea sauve vayateꞋene tamavaleꞋya hetilamatesageꞋya kaiyekea hulamatesagetama nagai kanale mono kea hamapaigahae. 10Hamapaigahayanagi hagoteꞋya Yisasi kanale mono kea aliꞋya ute ete huꞋya mukiꞋa kote veaꞋmogamina hamapaitesageno ma mopamoꞋa haꞋno hugahie. 11TamavaleꞋyama kaiyeke hulamatesaya kanafina kema hisaya yafena “NaꞋane huta hugahuneꞋ hutama tamakesa kuꞋmoꞋa ohutama afaꞋa viho. Ani kanafina kanale kema hisaya kea Anumaya KotiꞋa tamahapainagetama hugahae. Ani kea tamakai kea omalegi Anumaya Koti Alu Aotage AvamuꞋmoꞋa huno lamakesa hinagetama hugahae. 12Ani kanafina veaꞋmoꞋya amakaiꞋami nepuꞋamimona kame vayaꞋamimote amavaleꞋya visayaꞋamoꞋya ‘HamaegeꞋya faliho.’ huꞋya hugahae. NefaꞋa nafaꞋneyagaꞋa aniꞋa humategahae. NafaꞋneꞋamimoꞋya itaꞋafoꞋamimoꞋene-na aliyahae huꞋya kamea humateteꞋya ‘Hamaetama faliho.’ huꞋya hugahae. 13Nagima neꞋayaya yafe mukiꞋa veaꞋmoꞋya haviꞋya amaipa kafa helamategahae. NagoꞋa veaꞋmoꞋya nagai kemona meni kanaleti aepa heꞋya atafa huꞋya tokiyaꞋage hume hume neꞋvisageꞋna YisasiꞋna eteꞋnama esua kanafina nagai kema atafa hulinesaya veaꞋmogamina Anumaya KotiꞋa amaku amamena aligatigahie.

TusiꞋa havi yatafa falote hugahie.

14YisasiꞋa nagoꞋene mage huno hie tusiꞋa havi yana ma mopa alino hagagitalesia yana alu aotage yapi hetimainesigetama agegahae. Anima tamamaꞋyoma aisia yama agenuta-mahena Yutia mainaya veaꞋmogatama tamaiyayetama agoꞋyalega viho. Ani YisasiꞋma humainea kema hapalitama havisamogatama havilama hutama haviho. 15Nagi nago kanomoꞋa nogatofuleꞋma haino maineno ani kema havinunofena tavino nomaꞋafinagati haifaleno nagoꞋa yana oꞋalino. AfaꞋa aiyayeno vino. 16NagoꞋa veaꞋmoꞋya hoyafinagama mainesaletila kenaꞋamima aligahena notega eteꞋya oꞋviho. 17AvoꞋnio ani kanafina tusiꞋa havi yamo falote hugahie. Amaipaene aꞋnene nute anilinesia nafaꞋnemogami itaꞋamimoꞋyaenefena tusiꞋa nahau nehie. 18Anumaya Kotitega nunamuna mage hutama havigeho “Ani havi yamoꞋa tani koꞋma ikate tisia kanafina falote ohisie.’ hutama havigeho. 19Ani kanafina tusiꞋa kana ya falote hugahie. EheꞋma Anumaya KotiꞋa ma mopama talo humalenea kanafiꞋene meni kanafiꞋenena aniꞋa ala kana yana falote ohuneanagi tusiꞋa ala kana yamoꞋa nagoꞋene haenagaꞋa aniꞋa huno falote ohugahie. 20Anumaya KotiꞋa ani havi kanama alino aupa ohileꞋasina mukiꞋa veaꞋmoꞋya falileꞋasinagi Anumaya KotiꞋa haigenoꞋma hapalimatenea veafe agesa havino amaugafa aligatisia yafe ani kanaꞋa alino aupa hugahie. 21Ani kanafina nagoꞋa veaꞋmoꞋya mage hugahae “Anumaya KotiꞋma taugafa aligatigahie huno hutenea kanoa ma mainegi ageho. Atu mainegi ageho.” huꞋya hisagetamahena “Tamage nehae.” hutama havitama tamametitia ohiho. 22Ani kanafina nagoꞋa havigeꞋage amaune vayaꞋene “Nagaya Anumaya KotiꞋma tamaugafa aligatigahie huno hunatenea kano mainoe.” huno havige hisia kanoene evaꞋyi huꞋya veaꞋmogamina ayemavataga hugahe tokiyaꞋage avame yana hugahayanagi Anumaya KotiꞋa haꞋye huno hapalimatenea veaꞋmoꞋya ohavigahae. 23Ohavigahagi falote ohunaya kanafina ago tamahapaimainogi kaꞋyetama maiho.

HaenagaꞋa Ikapinagati emainea kanoa vayaꞋmo atenea nafaꞋnea egahie.

24Ani havi kanamoꞋa haꞋno hutesigeno yagemoꞋa hanimaꞋage hinageno ikamoꞋa aivasa ohugahie. 25KaꞋnefiꞋmoꞋya ikatetila atafailavigahie. IkateꞋma hanea yaꞋyagamoꞋya kanage kanage huno alu kate kate vaiyegahie. 26MukiꞋa ani yamoꞋa falote hutesigeꞋna ikapinagati emainoa kanoa vayaꞋmo natenea kanomoꞋna ikapinagatila siate elavisugeꞋya nagegahae. TusiꞋa tokiyaꞋniene tusiꞋa hale yaniꞋaene esugetama nagegahae. 27NenagesageꞋna ensole vayaꞋnia humatesugeꞋya yagemoꞋma tavi nefalelegatiꞋene evaꞋyi nehilegatiꞋene aluga aluga haupalegatiꞋene mukiꞋa mopaene mopaene nagaiꞋniꞋa nahaigeꞋna hapalimatenoa veaꞋnea aluga aluga mukiꞋa ma mopamona atupaletiꞋene ikamo atupaletiꞋene amavalesageꞋya melitalu hugahae.

Tamakaya fiki yosale agevame hiho.

28YisasiꞋa mage huno hie “Fiki yosamoꞋa nago avame ya tamaveligahigi ageho. Ani yosamoꞋa hagoteno akopapitiꞋma agusasiyeno amuꞋma malesigetamahena ‘Anuna valesia kanamoꞋa falote hugahe nehie.’ hutama nehae. 29NaꞋa hugahayanagi manima tamahanepauva kuguva yama agenutamahena “YisasiꞋa esia kanamoꞋa ago aupa higeno fiate hetino maineanagino ago egahie.’ hutama tamakesa havigahae. 30Nagaya tamage huꞋna tamahanepauve meni kanafima mainaya veala ofalinesageno ani yamoꞋa falote hugahie. 31IkaꞋene mopaene fanane hugahianagi nagai kemoꞋa fanane ohugahie.

Ani yama falote hisia kanahena nago kanomoꞋa ohavine.

32Manima tamahapauva kanama falote hisia kanahena nago kanomoꞋa ohavine. Ikapinaga mainaya ensole vayaꞋmoꞋya ohavinae. Anumaya Kotina nafaꞋneꞋamoꞋna ani kanama falote hisia kanahena ohavinoanagi nenafaꞋa agaiꞋage haviline.

33Tamakaya ani kanama falote hisia kanahena ohavinaya yafe tamaula ofaetama tamakaitamile yagaiho. 34Nago kava kanomoꞋma hia kava huno YisasiꞋa egahie. Ani kava kanomoꞋa aliꞋya vayaꞋamofena ‘Ma aliꞋyana alu aliꞋya alu aliꞋyana tamahaote tamahaote yagaitama maiho.’ huneꞋamateno “FiateꞋma mainamoga kagaikaꞋa yagaiyo.” huneꞋateno ataleno alu kotega umaine. 35NaꞋa humaineafe tamakaya aniꞋa hutama yagaiho. Nomona nefaꞋma esia kanahena ohavinae. Une esio? Kege amuꞋnopi esio? KokolemoꞋa age neꞋaisigeno esio? Ifi nate esio? Esia kanahena ohavinaya yafe kava yagaitama maiho. 36Faetama mainesageno havigu aupaꞋa esigetama tamakaye hu yafenagi kaꞋyetama maiho. 37Mani kea tamakaifema hua kea mukiꞋa veaꞋmogamife nehugi kava yagaitama tokiyaꞋage hutama maiho.” huno hamapaiye.